Home / Lajme / Ekspertët pohojnë se Kosova nuk humb territor me demarkacionin e kufirit me Malin e Zi

Ekspertët pohojnë se Kosova nuk humb territor me demarkacionin e kufirit me Malin e Zi

Prishtinë, 21 shkurt 2017 – Komisioni i ekspertëve për matjen e territorit të Republikës së Kosovës, ka bërë publik draft-raportin e parë rreth gjetjeve për matjen e territorit të Kosovës, njoftjnë mediat kosovare.

Kryetari i komisionit, Hivzi Islami tha se territori i Kosovës aktualisht është 10 mijë e 905 kilometra katrorë.

Komisioni ka konstatuar se Kosova nuk humb territor nga demarkacioni me Malin e Zi. Zëdhënësi i këtij komisioni, Tomor Qela, ka thënë se të gjitha gjetjet e ekspertëve tregojnë se Çakorri gjendet jashtë territorit të Republikës së Kosovës. I pranishëm ishte edhe kryeministri, Isa Mustafa.

Komisioni i ekspertëve për matjen e territorit të Republikës së Kosovës, prezantoi raportin me të dhëna, materialet dhe gjetjet. Kryetari i komisionit, njëherësh kryetar i Akademisë së Shkencave dhe Arteve të Kosovës, Hivzi Islami, fillimisht në mënyrë kronologjike foli për punën e këtij komisioni. Ndërsa pas paraqitjes së argumenteve paraqiti konkluzionet. Islami tha se madhësia territoriale e Kosovës para 25 gushtit 2015, përkatësisht nga viti 1961 deri në vitin 1981 është 10 mijë e 887 kilometra katrorë. Ndërsa nga viti 1982 deri në vitin 2007 është 10 mijë e 908 kilometra katrorë. Por, megjithatë ky territor është zvogëluar pak pas demarkacionit me Maqedoninë.

“Me demarkacionin e kufirit mes ish RSFJ-së, Serbia dhe Mali i Zi dhe Maqedonisë, ka një ndryshim të vogël të sipërfaqes në zonat kadastrale të Debëlldesë, minus, Restelicës minus, dhe Dimsës plus në kufi më Maqedoninë. Prandaj madhësia territorial e Republikës së Kosovës sot është 10 mijë e 905.25 kilometra katrorë”, tha Islami.

Para konkluzioneve, argumentet e deponuara nga agjencitë përkatëse të involvuara në proces, i prezantoi Tomor Qela, që është zëdhënës i këtij komisioni. Qela tha se janë ofruar shumë argumente shkencore të autorëve të ndryshëm të botuar nëpër revista e në institucione të rëndësishme të ish Krahinës Socialiste Autonome të Kosovës. Me këtë rast përmendi publikimet e Riza Çavollit, Mark Krasniqit, Bojko Bojoviqit, Marko Knezeviqit, e autor të tjerë, të cilët, sipas Qelës, dëshmojnë se Çakorri dhe Bjelluha nuk kanë qenë pjesë e territorit të Kosovës.

“Argument tjetër i deponuar në sekretarinë e Komisionit, është një libër i botuar nga Grup Autorësh, në botimin e tyre ‘Natyra e Kosovës’, Prishtinë, 1985, ku paraqesin hartën e shkallës 1 me 50 mijë të Parkut Nacional Bjeshkët e Nemuna, në të cilën vërehet qartë se Çakorri gjendet jashtë territorit të Kosovës”, tha Qela.

Qela prezantoi edhe argumentet e paraqitura nga KOST-it, Agjencia e Kadastrave të Kosovës, e agjenci të tjera, të cilat, sipas tij, tregojnë se Kosova nuk po humb territor me demarkacionin me Malin e Zi, dhe se të gjitha hartat e publikuara para viteve ’90-a janë të ngjashme me hartën e tanishme.

Kryetari i komisionit, Hivzi Islami, theksoi se pjesë e këtij komisioni nuk ishin vetëm përfaqësuesit e partive opozitare dhe përfaqësuesit e Deçanit dhe Junikut dhe Rugovës, e po ashtu tha se është kërkuar që edhe profesorët e Departamentit të Gjeografisë të Universitetit të Prishtinës të jenë pjesë e këtij procesi, mirëpo ata nuk kanë pranuar. Sidoqoftë, ai garantoi se komisioni ka qenë i pavarur në punën e tij.

“Komisioni në punën e tij ishte plotësisht i pavarur, larg ndikimeve dhe animeve politike, partiake dhe të grupeve të interesit. Në punën e tij, nga fillimi deri më sot mbisundoi profesionalizmi”, tha Islami.

Akademik Islami tha se deri më 24 shkurt në ndërtesën e qeverisë i gjithë materiali do t’i ofrohet opinionit publik dhe komisioni do të marrë parasysh çdo vërejtje të argumentuar me rastin e hartimit të raportit përfundimtar, i cili do t’i dorëzohet Qeverisë së Kosovës.

1,648 total views, 1 views today

About Kasam Selimi

Check Also

Alban Pnishi nga Zvicra transferohet në Izrael te Bnei Sakhnin

  Mbrojtësi shqiptar i Kosovës, Alban Pnishi nga kampionati zviceran, Super Liga është transferuar në …

Lini një Përgjigje